Алматы қаласы бойынша Экономикалық тергеу департаменті "Рейдерлік" бабы бойынша Болат Назарбаев пен оның бұрынғы әйелі Майра Құрманғалиеваның үстінен қылмыстық іс қозғады. Бұл туралы журналист Михаил Козачков өзінің телеграм -каналында мәлім етті.
Журналист тиісті арызды Karuan ЖШС құрылтайшыларының бірі болдым, кейін үлесімді тартып алды деген Нұрша Кәкенов есімді азамат жазғанын, ол тартып алынған үлесін 150 миллион долларға бағалайтынын айтады.
"Ашық деректерде Karuan компаниясы Маңғыстау облысында марганец өндірумен айналысқан делінген. Еgov.kz базасындағы дерекке сүйенсек, 2006 жылдың басында Нұрша Кәкенов шынымен де компания иелерінің бірі болған, алайда сол жылы-ақ ЖШС-нің жалғыз құрылтайшысы экс-президенттің інісі болып шыға келеді. 2018 жылғы ақпаннан бастап фирма екі заңдық тұлғаға тиесілі. Оның бірі – "Орта-Азиялық инвестициялық консалдингтік компания, екіншісі – Кипрде тіркелген ILMAX LTD компаниясы. Karuan ЖШС 2021 жылы ұызметін тоқтатқан" деп жазады журналист.
