Ит тірлік – ауыл жағдайы.

Ит қырылған жыл – қазақтың қалмақтарды жеңген кезі.

Ит өлім – қаңғыбастың о дүниеге аттануы.

Итшілеу – базар, вокзалда тәшкі сүйрету.

Иттей болу – пәтер жалдау.

Иткөздену – кіндігін ашып жүретін қыздарға қарау.

Ит мінез – бастықтардың болмысы.

Ит өлген жер – шалғайдағы ауылдар.

Иткүрке – саяжай.

Ине жұтқан иттей күн кешу – жатақхана студенттерінің аш қарын жүруі.

Итсигек – дәретхана.

Италақаз – Америка құрама штаттары.

Итмұрын – жерді «тіміскілеген» геолог, археологтар.

Итбалық – водолаз.

Ит-құс – шетелдік инвесторлар.

Итжанды – кедей және қайыршылар.

Итаяқ – статистика.

Ит терісін басына қаптау – Мұхтар Шахановтың ана тілінен мақұрым қазақтарды сынауы.

Итжейде – өлшеп сатылатын арзан киімдер.

Иттіс – соғысқұмар президенттердің азуы.

Ит қорыған жерге өш – жезөкшелер жайлаған көшелер.

Итжеккен – «Жетім бұрыш».

Ит жоқта шошқа үреді – Қазақстандағы орыс тілінің үстемдігі.

Ит итті, ит құйрығын жұмсайды – бір тапсырманы облыс басшысы аудан әкіміне, ал аудандікі ауыл әкіміне береді.

Аузына ақ ит кіріп, көк ит шықты – темекі шегіп тұрған адам.

Итше ырылдасу – айтыс өнеріндегі ақындардың сайысы.

Ит пен мысықтай – билік пен оппозицияның арақатынасы.

Итім білсін – «жұбайым білуі тиіс».

Ит сілікпесін шығару – айықтырғыштағы мастардың «қалтасын қағу».

Ит байласа тұрғысыз – моноқалалар.

Ит үреді, керуен көшеді – БАҚ сынынан шенеуніктер нәтиже шығармайды.

Үйдің кішісі болғанша, иттің күшігі бол – Шешенстанға шабуыл жасаған Ресейдің талабы.

Үйкүшік – Өскеменге қосылған Семей мен Қостанай қарамағындағы Торғай.

Күшік күйеу – тәуелді мемлекет.

Сүтке тиген күшіктей – жұмыссыз қалған адам.

Итаршы – саяси өкілдер.

Итшана – министрлік жетегіндегі агенттік, департаменттер.

«Кет!» дегенде ит те кетеді – Желтоқсан көтерілісінен кейін Колбиннің тақтан таюы.

Иттен де жаман – Сталин.

Итше ұлу – кейбір эстрада «жұлдыздарының» сиқы.

Ит жылы – айтпаса да түсінікті ғой.

Еркеғали БОЛАТҰЛЫ